Türkiyədə helikopter qəzaya uğrayıb, 12 nəfər həlak olub - VİDEO - YENİLƏNİB-2

Bakı. 18 aprel. REPORT.AZ/ Türkiyənin Tunceli əyalətində qəzaya uğramış helikopterdəkilərin hamısı həlak olub. 

"Report" Türkiyə KİV-inə istinadən xəbər verir ki, helikopterdə 1 hakim, 1 gizir, 7 polis əməkdaşı və 3 ekipaj üzvü olub. 

*** 17:03

Türkiyənin Tunceli bölgəsinin Pülümür rayonunda qəzaya uğrayan helikopter havaya qalxdıqdan 10 dəqiqə sonra yerə düşüb.

“Report” "Habertürk"ə istinadən xəbər verir ki, Türkiyə vaxtı ilə 11.40-dan (Bakı vaxtı ilə 12.40) helikopterlər əlaqə kəsilib. 

Məlumata görə, helikopterin ekipajı “112” telefon nömrəsinə zəng edərək “7 yaralı var” deyib. 

Xəbərdə bildirilib ki, hadisə yerinə 5 əyalətdən 43 xilasedici göndərilib.

Türkiyənin Tunceli əyalətində göyərtəsində 12 nəfər olan helikopter qəzaya uğrayıb.

"Report" Türkiyə KİV-inə istinadən xəbər verir ki, helikopter hakim və polisləri daşıyırmış.

Məlumata görə, helikopterdəkilərdən biri hakim, biri gizir, 7-i polis əməkdaşı, 3-ü isə ekipaj üzvüdür. 

Xəbərdə bildirilib ki, “Sikorsky S-70 Blackhawk” helikopteri Türkiyə Daxili İşlər Nazirliyinin Təhlükəsizlik Baş İdarəsinə məxsusdur.

Hadisə yerinə Ərzurum və Diyarbakırdan 20 nəfərlik xilasedici dəstə göndərilib.

İlkin məlumata görə, qəza əlverişsiz hava şəraiti səbəbindən baş verib.