Mübariz Qurbanlı Gürcüstana səfər edəcək

Azərbaycanın Gürcüstandakı səfiri Faiq Quliyev bu ölkənin Dini Məsələlər üzrə Dövlət Agentliyinin sədri Zaza Vaşakmadze ilə görüş keçirib.

“Report”un yerli bürosu xəbər verir ki, görüşdə iki ölkə arasında din sahəsindəki münasibətlər müzakirə olunub.

Tərəflər həmçinin Agentlik və Azərbaycanın Dini Qurumlarla İş üzrə Dövlət Komitəsi (DQİDK), Gürcüstanın Ruhani Akademiyası və Azərbaycanın İlahiyyat İnstitutu arasında memorandumların imzalanması məsələsini də nəzərdən keçiriblər.

F.Quliyev bildirib ki, Gürcüstanın Baş naziri İrakli Qaribaşvili və Azərbaycan Prezidenti İlham Əliyev arasında münasibətlər xüsusi xarakter daşıyır və bu da çox mühüm əhəmiyyət kəsb edir.

Qeyd olunub ki, yaxın gələcəkdə DQİDK sədri Mübariz Qurbanlının Gürcüstana səfəri planlaşdırılıb və bu, iki ölkə arasında münasibətləri daha da dərinləşdirəcək.

Görüşdə Azərbaycanın Gürcüstandakı səfirliyinin məsul əməkdaşları Anar Rəsulov, Ramel Lətifov və gürcü din xadimləri də iştirak ediblər.