Gürcüstanın Konstitusiya Məhkəməsi prezidentin impiçmenti ilə bağlı dinləmələri başa çatdırıb

Gürcüstan Konstitusiya Məhkəməsi üçüncü iclasında prezident Salome Zurabişvilinin impiçmenti ilə bağlı dinləmələri başa çatdırıb.

“Report” “İmedi” telekanalına istinadən xəbər verir ki, səkkiz saatdan artıq davam edən iclasdan sonra məhkəmənin sədri Merab Turava bildirib ki, yekun qərar müəyyən edilmiş müddətdə, yəni oktyabrın ortalarında elan ediləcək.

Hakim partiyanın nöqteyi-nəzərindən prezident hökumətin razılığı olmadan xarici səfərlər edərək konstitusiyanı pozub.

Zurabişvilinin vəkilləri konstitusiyada prezidentin beynəlxalq münasibətlərdə ölkəni təmsil etməsi ilə bağlı maddəyə müraciət edirlər. Onların fikrincə, əsas qanunun 52-ci maddəsinin tələbinə görə, Zurabişvilinin bütün səfərləri Nazirlər Kabineti ilə razılaşdırılmamalıdır.

Sentyabrın əvvəlində Zurabişvili Berlin, Brüssel və Parisə səfər edib və burada yüksək səviyyəli görüşlər keçirib. Sonradan məlum oldu ki, Gürcüstan hökuməti onun buna razılıq vermədiyi üçün hakim partiya prezidenti konstitusiyanı pozmaqda ittiham edib və impiçment proseduruna başlayıb.