Səfir: “Aİ minalardan təmizlənmə prosesində Azərbaycana yardımı davam etdirəcək”

“Avropa İttifaqı Azərbaycanın işğaldan azad edilmiş ərazilərinin minalardan təmizlənməsi prosesinə dəstəyini davam etdirəcək”.

“Report” xəbər verir ki, bunu Avropa İttifaqının (Aİ) Azərbaycandakı nümayəndəliyinin rəhbəri Peter Mixalko dekabrın 15-də Bakıda keçirilən mətbuat konfransında deyib.

“Minalardan təmizlənmə azad edilmiş ərazilərin bərpasının vacib hissəsidir. 27 ölkə bu prosesi dəstəkləyir”, - o bildirib.

Onun sözlərinə görə, Aİ layihələri bütün ölkəni əhatə edir: “Biz artıq işğaldan azad edilmiş ərazilərə dəstək üçün belə bir fürsəti nəzərdən keçiririk. Hakimiyyətdən bu ərazilərdə hansı layihələrin prioritet olması ilə bağlı cavab gözləyirik”.

O əlavə edib, bu layihələrdə iştirak Azərbaycan üçün artıq elan olunmuş 2 milyard avro məbləğində iqtisadi və investisiya dəstəyi paketi çərçivəsində digər alətlərdən istifadə etməklə mümkündür.

P.Mixalko Cənubi Qafqazda dayanılıq sülh və rifahın bərqərar olacağına ümid etdiyini vurğulayıb.