Qazaxıstan səfiri: “Cənubi Qafqaz regionuna sülh və inkişafın gələcəyinə ümid edirik”

“Ümid edirik ki, Cənubi Qafqaz regionuna sülh və inkişaf gələcək, bu, hamımız üçün önəmlidir”.

"Report" xəbər verir ki, bunu Qazaxıstanın Azərbaycandakı səfiri Alim Bayel Laçına səfəri zamanı jurnalistlərə deyib.

"Bu gün digər ölkələrin səfirləri ilə birlikdə Azərbaycanın ən gözəl bölgələrindən biri olan Laçın rayonuna gəlmişik. Burada yenidənqurma və abadlıq işləri aparılır.

Laçın rayonunun bəzi sakinləri artıq öz doğma yurdlarına qayıdıblar. Bizim onlarla söhbət etmək imkanımız oldu”, - diplomat bildirib.

Səfir Laçının təbiətinin çox gözəl olduğunu qeyd edib və bu rayonun böyük iqtisadi potensiala malik olduğuna əminliyini ifadə edib.