İrsi qan xəstəliyi olanların əlilliyinin müddətsiz müəyyən edilməsilə bağlı qanunvericiliyə dəyişiklik edilir

“Hemofiliya və talassemiya irsi qan xəstəliklərinə düçar olmuş şəxslərə dövlət qayğısı haqqında” qanuna dəyişiklik edilir.

"Report"un xəbərinə görə, dəyişikliklə qanunun 9-cu maddəsinin (İrsi qan xəstəliyi olan şəxslərin sosial müdafiəsi) 9.2-ci bəndi yeni redaksiyada verilir.

Yeni redaksiyaya əsasən, irsi qan xəstəliyi olan şəxslərin əlilliyi onlar 18 yaşına çatanadək müəyyən edildikdə, 18 yaşına çatdıqdan sonra bu şəxslərin əlilliyi müddətsiz müəyyən ediləcək.

Qanunun hazırki bəndi isə belədir: "İrsi qan xəstəliyi olan şəxslərin əlilliyi, o cümlədən sağlamlıq imkanlarının məhdudluğu “Əlilliyi olan şəxslərin hüquqları haqqında” Azərbaycan Respublikasının Qanununa uyğun olaraq müəyyən edilir. İrsi qan xəstəliyi olan 18 yaşına çatanadək sağlamlıq imkanlarının məhdudluğu müəyyən edilmiş 18 yaşından yuxarı əlilliyi olan şəxslərə əlillik müddətsiz müəyyən edilir".