Medianın İnkişafı Agentliyinin təşkilatçılığı ilə “Yeni media mühitində təhsil və məşğulluq imkanları” “MEDİAlab” layihəsinin hesabat konfransı keçirilib.
"Report" xəbər verir ki, konfransın açılış mərasimində çıxış edən Medianın İnkişafı Agentliyinin İcraçı direktoru Əhməd İsmayılov dünya miqyasında rəqəmsal texnologiyaya sürətli keçidinin, iqtisadiyyatın bütün ənənəvi sahələrində olduğu kimi media sahəsində də innovasiya və texnologiyaların tətbiqinin və ən əsası bunu bacara bilən kadrların hazırlanmasının zəruriliyini qeyd edib.
O bildirib ki, "MEDİAlab" layihəsinin fəaliyyət planının tədris proqramına uyğunlaşdırılması məqsədilə layihənin tərəfdaş universitetlərində təhsil alan 1000-ə yaxın tələbə arasında keçirilən sorğu nəticələrinin data əsaslı təhlili, media subyektləri ilə davamlı iş və çoxtərəfli kommunikasiya nəticəsində inkişafla bağlı hiss edilən ehtiyaclar, media sahəsində məşğulluqla bağlı həm yerli, həm də beynəlxalq tendensiyaların müqayisəli analizi və gənclərə məşğulluq imkanlarının yaradılmasının beynəlxalq təcrübədə verdiyi müsbət nəticələr bir daha gənclərə və gələcəyə ümidli olmağa əsas yaradır.
Əhməd İsmayılov vurğulayıb ki, qısa bir müddətdə layihə çərçivəsində əldə edilən uğurlar və növbəti mərhələdə bu sahədə təcrübə və məşğulluq imkanları ilə bağlı daha təkmil mexanizmlərin hazırlanması məqsədilə imzalanan Çoxtərəfli Əməkdaşlıq Memorandumu hər bir tərəfdən prosesin dəstəklənməsi və ümumi yanaşmanın uyğunluğunun göstəricisidir.
Tədbirdə çıxış edən Dövlət Məşğulluq Agentliyinin İdarə Heyətinin sədri Mustafa Abbasbəyli media sahəsində işəgötürənlərə dəstək xidmətinin əhatə dairəsinin genişləndirilməsi, eyni zamanda, bu istiqamətdə davamlı tədbir və proqramların təşkili məqsədilə imzalanan Çoxtərəfli Əməkdaşlıq Memorandumu haqqında öz fikirlərini bölüşüb.
Konfrans zamanı “MEDİAlab” layihəsi çərçivəsində təşkil edilən tədbirlərdən görüntülərin əks olunduğu videoçarx nümayiş olunub.
Sonra Medianın İnkişafı Agentliyinin “Media dəstək layihələri və strateji planlaşdırma” şöbəsinin müdiri Ləman İsgəndərova çıxışı zamanı layihə haqqında ətraflı məlumat verərək layihənin gənclərin yaradıcı düşüncəsini inkişaf etdirməyə, müasir media çağırışlarına uyğun yeni ideyaların formalaşmasına və məzmun istehsal etmə bacarıqlarının inkişafı üçün əlverişli mühit yaratmasına, komanda ilə işləmə bacarıqlarını təkmilləşdirməsinə yönəlməsindən danışıb.
Tədbir çərçivəsində istedadlı və təşəbbüskar gənclərin seçilməsi, müvafiq istiqamətlər üzrə potensial kadrların müəyyənləşdirilməsi məqsədilə ilə Azərbaycan Respublikasının Medianın İnkişafı Agentliyi və "AzerGold" Qapalı Səhmdar Cəmiyyətinin birgə təşkilatçılığı sayəsində təşkil edilən “Kreativ Media - Bakı” adlı məzmun müsabiqəsinin nəticələri açıqlanıb, qalib seçilən 20-ə yaxın gəncə mükafatlar təqdim edilib.
Konfransın sonunda layihənin əsas tərəfdaşları olan ali təhsil müəssisələrindən əlaqələndirici şəxslərə nəticələrin əldə olunmasındakı dəstəyə, ümümi layihənin təşkilində göstərdikləri etimad və bu sahənin inkişafına verdikləri töhfəyə və səmərəli əməkdaşlığa görə, layihə çərçivəsində seçilən MEDİA səfirlərinə isə fəal iştiraklarına görə təşəkkürnamələr təqdim edilib.
Qeyd edək ki, "MEDİAlab" layihənin əsas məqsədi media sahəsində innovasiya və inkişaf yönümlü fəaliyyətin davamlılığının təmin edilməsi, təhsil prosesində ənənəvi medianın rəqəmsal mediaya inteqrasiyasının dəstəklənməsi, texnoloji transformasiya zəncirinin əsas halqalarından olan insan resurslarının inkişafı üçün müvafiq sahədə kadr potensialının artırılması, media subyektləri və ali təhsil müəssisələri arasında qarşılıqlı fəaliyyət və əməkdaşlığın genişləndirilməsinə dəstək göstərilməsi, gənclərə rəqəmsal media bacarıqlarının təkmilləşdirilməsi üçün əlverişli ekosistemin yaradılmasıdır.
Xatırladaq ki, Çoxtərəfli Əməkdaşlıq Memorandumu əsasında müxtəlif KİV-lərdə işlə təmin olunacaq jurnalistlərin əməkhaqını Məşğulluq Agentliyi ödəyəcək.
![](https://static.report.az/photo/ff3b893b-c2e6-31cb-8edb-c9bdeda854ad_300.jpg)
![](https://static.report.az/photo/cedda42e-9550-3030-a9cc-f09c98231e67_300.jpg)
![](https://static.report.az/photo/018ad8d4-ad61-30e1-b191-dfe7ad1c9147_300.jpg)
![](https://static.report.az/photo/3a4eb7b6-691a-38a1-9409-81f8438f4591_300.jpg)
![](https://static.report.az/photo/d1c4bc54-5746-3e5d-a386-822d2a18a4fc_300.jpg)
![](https://static.report.az/photo/b5885f87-e046-33fc-9a03-72381b6832e0_300.jpg)
![](https://static.report.az/photo/e12695d2-48c2-3c82-adea-df511fd3f6a4_300.jpg)
![](https://static.report.az/photo/0717b472-79de-3722-b54b-62da128130e5_300.jpg)
![](https://static.report.az/photo/465c5be4-e632-3dd7-86b7-eaf629054beb_300.jpg)
![](https://static.report.az/photo/906c587a-448c-3f15-8e72-d60e3b4f136b_300.jpg)
![](https://static.report.az/photo/a3f40294-3178-36f6-88b5-b534e9a88d37_300.jpg)
![](https://static.report.az/photo/2cb5264b-55d4-3ea8-a01e-aca12799440d_300.jpg)
![](https://static.report.az/photo/a455b35c-5772-3307-9646-1a22a23dd20d_300.jpg)
![](https://static.report.az/photo/515c2a23-568b-3364-8cc4-20d28448f5c2_300.jpg)
![](https://static.report.az/photo/c0a7a78d-1ce8-3a53-90e3-609238a622df_300.jpg)
![](https://static.report.az/photo/94b0b649-78a2-33f4-a74c-a3a91a7e3f93_300.jpg)
![](https://static.report.az/photo/4e6945c6-b35f-3781-9511-d2e4827fcdeb_300.jpg)
![](https://static.report.az/photo/fb5b9897-3309-340d-9f71-d1ef9345524d_300.jpg)
![](https://static.report.az/photo/381a62f3-e5cb-3dda-b845-6edcff86c0e6_300.jpg)