"Şuşa - İƏT Gənclər Paytaxtı 2024"ün iştirakçıları Şuşa və Xankəndi turuna çıxıb

“Şuşa - İslam Əməkdaşlıq Təşkilatının Gənclər Paytaxtı 2024" Beynəlxalq Proqramının bağlanış mərasimindən sonra iştirakçılar Şuşa və Xankəndi turuna çıxıblar.

"Report"un Şuşaya ezam olunmuş əməkdaşının xəbərinə görə, qonaqlar əvvəlcə Qarabağ Universitetinə və şəhər meydanına baş çəkiblər.

Əcnəbi qonaqlar daha sonra Yuxarı Gövhər Ağa məscidi və Şuşa qalası ilə tanış olublar.

İştirakçılara uzun müddət işğal altında qalan Şuşa və Xankəndi şəhərləri barədə ətraflı məlumat verilib.

Şuşa səhərində üç gün davam edən tədbirdə İslam Əməkdaşlıq Təşkilatına üzv və müşahidəçi ölkələrin 300-ə yaxın rəsmi nümayəndəsi, gənclər və könüllülər iştirak ediblər.

Xatırladaq ki, 2023-cü ilin oktyabr ayında İƏT Gənclər Forumunun İcraiyyə Şurasının 11-ci iclasında Qarabağın incisi Şuşa şəhəri 2024-cü il üçün İslam Əməkdaşlıq Təşkilatının “Gənclər Paytaxtı” elan olunub.

Qeyd edək ki, Prezident İlham Əliyev 2024-cü il aprelin 17-də “Şuşa şəhərinin 2024-cü il üçün “İslam Əməkdaşlıq Təşkilatının gənclər paytaxtı” seçilməsi ilə bağlı sərəncam imzalayıb.