Heydər Əliyev haqqında kitab ədəbiyyat ictimaiyyətinə təqdim olunub

Ümummilli Lider Heydər Əliyevin 100 illiyi ilə bağlı Dövlət Təhlükəsizliyi Xidməti (DTX) tərəfindən hazırlanan, Ulu Öndərin həyat və fəaliyyətini, dahi şəxsiyyətin mənalı ömrünün təhlükəsizlik orqanlarında keçən hissəsini özündə əks etdirən “Ulu Öndər silahdaşlarının xatirələrində” adlı kitab ədəbiyyat ictimaiyyətinə təqdim olunub.

“Report” xəbər verir ki, tədbirdə Azərbaycan Yazıçılar Birliyinin sədri, Xalq yazıçısı Anar, AYB-nin katibi, Xalq yazıçısı Çingiz Abdullayev, DTX-nin Mətbuat xidmətinin rəhbəri Tamerlan Rəhimov və ictimaiyyət nümayəndələri iştirak ediblər.

Kitabda vaxtilə təhlükəsizlik orqanlarında uzun müddət Heydər Əliyevlə birlikdə çalışmış, onunla mütəmadi birbaşa təmasda olmuş veteran əməkdaşların xatirələri yer alıb.

Kitabın yazılmasında əsas məqsəd Ulu Öndərin xüsusi xidmət orqanlarında çalışarkən xalqının rifahı və Azərbaycanın təhlükəsizliyi yolunda gördüyü işlərlə bağlı yeni məqamları ictimaiyyətin diqqətinə çatdırmaqdır.

Nəşr "Heydər Əliyev - Azərbaycan təhlükəsizlik orqanlarının ilk azərbaycanlı generalı" adlı giriş hissəsi ilə başlayır.

Kitabın ən önəmli, unikal cəhəti burada indiyə qədər heç bir yerdə dərc olunmayan, vaxtilə təhlükəsizlik orqanlarında Heydər Əliyevin rəhbərliyi altında çalışmış veteran əməkdaşların üzərində Ulu Öndərin imzası olan və onların şəxsi işlərində saxlanılan məxfi qrifli arxiv sənədlərinin, dahi rəhbərin bu təsisatda xidmət etdiyi vaxtlara aid fotoşəkillərin, o cümlədən Ümummilli Liderin Rusiya təhlükəsizlik orqanlarının arxivində saxlanılan şəxsi işindən olan sənədli materialların, həmçinin Özbəkistan və Qazaxıstan təhlükəsizlik orqanları veteranlarının xatirələrinin yer almasıdır.

Kitabda 42 veteran əməkdaşın Heydər Əliyevlə bağlı bölüşdükləri xatirələri, müxtəlif zamanlarda dövri mətbuatda dərc edilmiş məqalə və müsahibələri əks olunub. Kitabda Heydər Əliyevin silahdaşları qürur hissi ilə paylaşdıqları xatirələrində Ulu Öndərlə ilk tanışlıqlarından, aralarında mövcud olan rəhbər-işçi münasibətlərindən, onun əməkdaşlara diqqət və qayğısından, iş prinsipindən, geniş əməliyyat təfəkküründən, hadisələri qabaqcadan görə bilmək qabiliyyətindən, analitik və təhlil bacarığından ətraflı söhbət açırlar.

Onlar qeyd edirlər ki, məhz belə keyfiyyətləri sayəsində Heydər Əliyev mürəkkəb əməliyyat kombinasiyalarını uğurla həyata keçirir, qarşısında duran çətin tapşırıqların öhdəsindən layiqincə gələ bilirdi. Heydər Əliyevin təhlükəsizlik orqanlarında sıravi əməkdaşdan qurumun rəhbərinə, leytenant rütbəsindən general-mayor rütbəsinə kimi yüksəlməsi də sadalanan cəhətlərin müqabilində mümkün olmuşdu.

Qeyd olunur ki, Azərbaycan təhlükəsizlik orqanları məhz Ulu Öndərin miras qoyduğu vətənpərvərlik irsi və peşəkarlıq məktəbi əsasında fəaliyyət göstərir, bu orqanlarda xidmət vaxtilə Heydər Əliyevin müəyyən etdiyi meyarlar üzərində inkişaf etdirilir.

Dövlət Təhlükəsizliyi Xidmətinin rəisi general-polkovnik Əli Nağıyev kitaba yazdığı "Ön söz"də xüsusi vurğulayır: "Heydər Əliyevin şərəfli ömrünün 25 ilini həsr etdiyi Azərbaycan təhlükəsizlik orqanlarındakı fəaliyyəti, gələcək nəslə miras qoyduğu peşəkarlıq məktəbi xüsusi xidmət orqanlarının əməkdaşları üçün etalon olaraq qəbul edilir. Ulu Öndərin millətə və dövlətə sədaqət amalları isə daima gənc zabitlərə aşılanır".

Tədbirdə çıxış edən DTX-nin Mətbuat xidmətinin rəhbəri Tamerlan Rəhimov deyib ki, kitabın əsas özəl cəhəti bu günə kimi heç yerdə əks olunmayan şəkillərin çap edilməsi, Heydər Əliyevlə birlikdə çalışmış təhlükəsizlik orqanları əməkdaşlarının xatirələrinin yer almasıdır:

"Kitabda, həmçinin Ulu Öndərin şəxsən imzaladığı sənədlər yer alıb. Həmin sənədlər DTX-nin arxivində saxlanılır. Heydər Əliyev ilk azərbaycanlı general kimi təhlükəsizlik orqanlarının tarixinə düşüb, gələcək nəsil üçün peşəkarlıq nümunəsi miras qoyub. Bu gün də biz bu nümunəyə uyğun fəaliyyətimizi davam etdiririk".