Yuxarı

Gələn il Bakıda Lüsern Dünya Turizm Forumunun toplantısı keçiriləcək

Nazir Əbülfəs Qarayev Bakıda səfərdə olan Lüsern Dünya Turizm Forumunun rəhbərini qəbul edib

Bakı. 3 iyul. REPORT.AZ/ Bu gün mədəniyyət və turizm naziri Əbülfəs Qarayev Bakıda səfərdə olan Lüsern Dünya Turizm Forumunun rəhbəri Reto Viveri və baş menecer Martin Bart ilə görüşüb. Bu barədə "Report"a nazirlikdən məlumat verilib. 

Nazir ölkədə qeyri-neft sektorunun prioritet istiqamətlərdən biri olduğunu, bu xüsusda turizm sahəsinin inkişafına, o cümlədən beynəlxalq turizm əlaqələrinə, təcrübə mübadiləsinə mühüm önəm verildiyini diqqətə çatdırıb.

Bu baxımdan Azərbaycanın bu ilin aprelində İsveçrə Konfederasiyasının Lüsern şəhərində keçirilən 4-cü Lüsern Dünya Turizm Forumunda iştirakının əhəmiyyəti vurğulanıb.

Reto Viver Azərbaycanın Lüsern Forumunda qonaq ölkə qismində iştirakı çərçivəsində keçirilən təqdimatdan söz açaraq bu tədbirdən sonra ölkəmizə marağın daha da artığını qeyd edib: "Bu çox gözəl təqdimat idi. Azərbaycan mədəniyyətinin və milli mətbəx nümunələrinin nümayişi hər kəsin marağına səbəb oldu. Artıq İsveçrədə ölkənizi daha çox tanıyırlar".

Qonaq Azərbaycanda turizmin inkişafına göstərilən diqqətin təqdirəlayiq olduğunu və ölkəmizdə bu sahənin inkişafının beynəlxalq turizm təşkilatlarının da diqqətini çəkdiyini deyib.

Nazir də öz növbəsində son illər Azərbaycanın mədəniyyət və turizm sahəsində əldə etdiyi nailiyyətlərdən, Bakının ev sahibliyi etdiyi beynəlxalq tədbirlərdən bəhs edib. O bildirib ki, bu tədbirlər ölkəmizin dünyada daha da tanıdılmasına səbəb olub.

Sonra qonaqlar "Lüsern Dünya Turizm Forumu"nda Azərbaycanın iştirakı ilə bağlı hazırlanmış fotoalbomu nazirə təqdim ediblər.

Söhbət zamanı gələn ilin mart ayında Bakıda Lüsern Dünya Turizm Forumunun beyin mərkəzlərinin toplantısının (think thank) keçirilməsi ətrafında fikir mübadiləsi aparılıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi