Yaponiya “Fobos” missiyasının işə salınmasını 2026-cı ilə təxirə salıb

Daha əvvəl 2024-cü ilin sonuna planlaşdırılan Marsın peyki Fobosdan torpaq nümunələrinin toplanması və Yerə gətirilməsi üzrə Yaponiya missiyasının işə salınması 2026-cı ilə təxirə salınıb.

“Report” “Space News”a istinadən xəbər verir ki, bu barədə Yaponiya Aerokosmik Tədqiqatlar Agentliyi (JAXA) məlumat yayıb.

JAXA “Martian Moons eXploration” (MMX) missiyasının təxirə salınmasını Yaponiyanın avtomatik planetlərarası stansiyasında işə salınmalı olan yeni “H3” daşıyıcı aparatının imkanlarının sınaqdan keçirilməsi və Yer kürəsində avtomatik planetlərarası stansiyanın əlavə sınaqlardan keçirilməsi zərurəti ilə əlaqələndirib.

Qeyd edək ki, MMX Mars və onun iki peyki – Fobos və Deymosun tədqiqi üçün NASA-nın iştirakı ilə hazırlanmış alətlər dəsti də daxil olmaqla, çəkisi təxminən 4 ton olan kosmik gəmidir.

MMX-in əvvəlcə 2024-cü ilin sentyabrında işə salınması planlaşdırılırdı. Zond 2025-ci ilin avqustunda Marsın orbitinə çıxmalı, üç il orada qalmalı, 2029-cu ilin sentyabrında Yerə geri qayıtmalı idi.

MMX missiyasının 2026-cı ilə qədər təxirə salınması qərarı həm də Marsa missiyanın başlanması üçün növbəti mövcud pəncərə ilə əlaqədardır.