"InvestAZ"dan dünya maliyyə bazarları ilə bağlı həftəlik analiz

Ötən həftənin son ticarət günündə dərc olunan statistik rəqəmlərə görə, ABŞ-da Qeyri-kənd Təsərrüfatı Sektorunda Yeni Yaranan İşyerlərinin sayı (NFP) noyabrda 227 min nəfər artaraq bazar proqnozlarını üstələyib. İqtisadçılar isə artımın 202 min olacağını ehtimal edirdilər. Məlumatlara görə, noyabr ayında işsizlik səviyyəsi 4,2 % olaraq açıqlandı. Bu göstərici üçün isə proqnoz 4,1 % idi. İnflyasiya görünüşü baxımından izlənilən saatlıq qazanc tərəfində orta səviyyədə də olsa, ehtimalları üstələyən bir mənzərə ortaya çıxdı. Orta saatlıq qazanc noyabr ayında bir əvvəlki ayla müqayisədə 0.4% artdı. Proqnoz isə artımın 0,3 % olacağı yönündə idi. Orta saatlıq qazancların illik artımı 3.9% ehtimal olunsa da 4 % təşkil edib.

Əmək bazarına dair açıqlanan rəqəmlərə əsasən, ümumi mənzərə kifayət qədər yaxşı görünsə də, dollar major valyutalar qarşısında mövqelərini qoruya bilmədi.

Bu həftə isə iqtisadi təqvimdə yer alan ən önəmli xəbərlər, Avropa, İsveçrə və Avstraliya Mərkəzi banklarının faiz qərarlarıdır. Həftə ərzində, həmçinin, Amerikada, Almaniyada açıqlanacaq İstehlak Qiymətləri İndeksi və İstehsal Qiymətləri İndeksi göstəriciləri, eləcə də, İngiltərədə dərc olunacaq ÜDM hesabatı birjalara yön verə bilər.

EUR

Ötən həftə Avropa Statistika İdarəsinin (Eurostat) açıqladığı üçüncü rübün ÜDM hesabatına əsasən, Avrozonada mövsümi təsirlərdən təmizlənmiş ÜDM 2024-cü ilin üçüncü rübündə əvvəlki rüblə müqayisədə 0.4 % artıb.

İqtisadi artıma baxmayaraq, cari həftənin cümə axşamı günü Avropa Mərkəzi Bankının uçot dərəcələrini 0,50 % endirəcəyinə dair ehtimallar birjaları dilemma qarşısında qoyub.

Ötən həftəyə 1,0560 səviyyəsində start verən EURUSD məzənnəsi həftə ərzində 1.0460 səviyyəsinə kimi ucuzlaşsa da, buradan dəstək görərək bahalaşdı və həftəlik şamını elə 1,0560 həddində tamamladı.

Günün ilk ticarət saatlarında 1.0530 hədlərində qərarlaşan EURUSD məzənnəsində tendensiyanın necə davam edəcəyini aydınlaşdırmaq üçün investorlar, bu həftə Avropa Mərkəzi Bankının faiz qərarı və Almaniyada açıqlanacaq CPİ rəqəmlərini diqqətdə saxlayacaqlar.

GBP

Keçən həftəyə 1,2720 səviyyəsində başlayan GBPUSD məzənnəsi həftə ərzində 1.2610 həddinə qədər ucuzlaşsa da, buradan dəstək taparaq bahalaşdı və həftəni 1,2740 səviyyəsində tamamladı.

GBPUSD məzənnəsində "ayılar" qiyməti 1,26 ABŞ dolları həddinin altına qaytara bilsələr, eniş tendensiyası davam edə bilər.

XAUUSD

Noyabrın 26-dan bəri üfüqi dalğalanma sərgiləyən qızıl qiymətlərində tendensiyanın necə davam edəcəyini aydınlaşdırmaq üçün investorlar, bu həftə Amerikada dərc olunacaq inflyasiya göstəriciləri, eləcə də, AMB-nin və İsveçrə Mərkəzi Bankının fazi qərarını yaxından izləyəcəklər.

ABŞ dollarının bahalaşması sürətini itirdikcə qiymətli metala olan təzyiqlər də azalıb. Lakin, güclü dollar bir çox alıcı üçün qiymətli metala investisiya qoyuluşlarının maya dəyərini bahalaşdırır.

Ötən həftəyə 2656$ həddində start verən və həftəlik şamını 2633 ABŞ dolları həddində tamamlayan qiymətli metal hazırda 2639 ABŞ dollarından ticarət olunur. Qızılda mümkün eniş ssenarisində qarşıda duran əsas dəstək həddləri kimi, 2600 ABŞ dolları və 2536 ABŞ dolları hədləri çıxış edir.

OİLUK

Ötən həftə Səudiyyə Ərəbistanının başçılıq etdiyi "OPEC"-in enerji və neft nazirlərinin və Rusiyanın başçılıq etdiyi "OPEC+" ölkələrinin enerji və neft nazirlərinin bazar konyukturasını qiymətləndirmək üçün onlayn şəkildə bir araya gəldiyi 38-ci "OPEC" və "OPEC+" Nazirlər Toplantısı baş tutdu.

"OPEC"-in verdiyi açıqlamaya görə, 2025 və 2026-cı illər üçün üzv ölkələrin ümumi hasilat həcmi gündəlik 39 milyon 725 min barel olacaq.

"OPEC"-dən verilən başqa bir açıqlamaya görə, bəzi ölkələrin gündəlik könüllü olaraq tətbiq etdiyi 1,65 milyon barellik hasilat azaltmasının 2026-cı ilin dekabr ayının sonuna qədər uzadılmasına qərar verilib.

Lakin, qərara baxmayaraq neft qiymətlərində müşahidə olunan eniş tendensiyası səngimir. Keçən həftəyə 72,40 ABŞ dolları həddində başlayan OİLUK həftə ərzində 74,70 ABŞ dollarına kimi bahalaşsa da, "ayılar"ın təzyiqi ilə yenidən ucuzlaşdı və həftəlik şamını 71,40 ABŞ dolları həddində tamamladı.

İnvestisiya ilə bağlı suallarınızı: *1234 telefon nömrəsi və ya www.investaz.az veb saytı vasitəsilə bizə ünvanlaya bilərsiniz.

"İNVEST-AZ İnvestisiya Şirkəti" QSC-nin Tədris və Analiz Departamenti

"İNVEST-AZ İnvestisiya Şirkəti" Qapalı Səhmdar Cəmiyyətinin fəaliyyəti Azərbaycan Mərkəzi Bankı tərəfindən tənzimlənir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərməkdədir.