Fransanın AXA sığorta qrupu Azərbaycandakı törəməsini satır

Bakı. 21 fevral. REPORT.AZ/ Azərbaycan sığorta bazarında bir neçə sığorta şirkətinin yaradılmasında və idarə edilməsində iştirak etmiş iş adamı Elxan Qəribli Fransanın AXA Sığorta Qrupunun Azərbaycandakı törəməsi “AXA Mbask” sığorta şirkətinin 100% səhmlərini əldə edəcək.

“Report”a daxil olan məlumata görə, tərəflər arasında ilkin razılaşma artıq imzalanıb.

Əməliyyatın tamamlanması isə müvafiq orqanların razılığı alındıqdan sonra həyata keçiriləcək.

Xatırladaq ki, E.Qəribli 1992-ci ildən etibarən eyni şirkətin (Mbask) qurucusu və ilk rəhbəri olaraq sığorta fəaliyyətinə başlayıb. O, Azərbaycanda sığorta bazarının inkişafına uyğun biznes mühitinin olduğunu, iqtisadi qanunvericilikdə həyata keçirilən islahatlar sayəsində yerli investorlar üçün daha əlverişli şəraitin yarandığına inandığını deyib və bu səbəbdən “AXA Mbask”a investisiya qoymaq qərarına gəldiyini açıqlayıb.