Dünya üzrə birbaşa xarici investisiyaların həcmi azalıb

Koronavirus pandemiyası ilə əlaqəli iqtisadi eniş 2020-ci ildə dünya üzrə birbaşa xarici investisiyaların həcminin 2019-cu illə müqayisədə 1,5 trilyon ABŞ dollarından 1 trilyon ABŞ dollarınadək azalmasına səbəb olub. 2021-ci ildə bu baxımdan 10-15 %-lik artımın qeydə alınacağı gözlənilir.

“Report” xəbər verir ki, bu barədə BMT-nin Ticarət və İnkişaf üzrə Konfransının (UNCTAD) hesabatında deyilir.

UNCTAD-ın Baş katibi vəzifələrini icra edən İzabel Düran hesabatı təqdim edərkən bildirib ki, 2020-ci ilin sonuna olan vəziyyətə görə birbaşa xarici investisiyaların həcmi “10 il əvvəl qeydə alınmış dünya maliyyə böhranından sonrakı səviyyədən təxminən 20 % aşağıdır”.

“Bu il ərzində birbaşa xarici investisiyaların itirilmiş mövqelərini bir qədər bərpa edərək 10-15 % artacağını gözləyirik. İnvestisiya qoyuluşlarının sürət yığması üçün vaxt lazım ola bilər”, - Düran bildirib.

“Mövcud vəziyyət inkişaf sahəsində gözləntilərimizə ciddi təsir göstərir”, - o əlavə edib. Hazırda vəziyyət “bir neçə ay əvvəlki vəziyyətdən daha yaxşı olsa da”, qlobal iqtisadiyyat “gözləniləndən daha sürətlə bərpa olunsa da”, bu bərpa “qeyri sabit və həssasdır”.