AMB iqlim maliyyələşməsinin genişləndirilməsi üzrə müzakirələrə rəhbərlik edəcək

Azərbaycan Mərkəzi Bankı (AMB) iqlim maliyyələşməsinin genişləndirilməsi üzrə yüksək səviyyəli müzakirələrə rəhbərlik edəcək.

"Report" bu barədə quruma istinadən xəbər verir.

Belə ki, noyabrın 14-də AMB Maliyyə, İnvestisiya və Ticarət Günü çərçivəsində “Qlobal maliyyə sistemi: iqlim fəaliyyəti üçün maliyyələşmənin genişləndirilməsi” mövzusunda mühüm tədbir təşkil edəcək. Tədbir Çoxtərəfli İnkişaf Bankları (MDB-lər), investorlar da daxil olmaqla dövlət və özəl sektorların liderlərini bir araya gətirərək iqlim maliyyələşməsi fəaliyyətinin sürətləndirilməsini, yaşıl keçiddə Paris Sazişinin məqsədlərinə çatmaq üçün zəruri olan miqyasda resursların səfərbər edilməsini hədəfləyir.

Tədbir qlobal maliyyə institutlarının rəhbər şəxslərinin öz mövqelərini bölüşdüyü iki əsas panel sessiyasından ibarət olacaq:

“İqlim maliyyəsi: iqlim ambisiyasının maddi fəaliyyətə çevrilməsi” - bu sessiyada inkişaf etməkdə olan ölkələrdə iqlim maliyyəsinin genişləndirilməsi strategiyaları diqqətə çatdırılacaqdır. Həmçinin MDB-lər, tənzimləyici çərçivələrdəki dəyişikliklər və maliyyə innovasiyaları arasında uyğunluğun iqlim öhdəliklərinin effektiv fəaliyyətə çevrilməsindəki rolu araşdırılacaq.

“Qlobal maliyyə üzrə qarşılıqlı fəaliyyət vasitəsilə iqlim maliyyəsinin genişləndirilməsi” – bu panel sessiyası zamanı MDB və daha geniş maliyyə sistemi arasında təkmil koordinasiyaya xüsusi diqqət yetirilməklə tənzimləyici çərçivələrin və təcrübələrin daha yaxşı uyğunlaşdırılması araşdırılacaq. Həmçinin iqlim maliyyəsində qlobal qarşılıqlı fəaliyyətin əldə olunma üsulları müzakirə olunacaq.

Tədbirdə Azərbaycan banklarının maliyyə sisteminin yaşıllaşdırılması və ölkəmizdə yaşıl keçidin sürətləndirilməsi istiqamətində maliyyə öhdəlikləri elan olunacaq.

Bu tədbirdə yalnız Mavi Zonada akkreditasiyadan keçmiş şəxslər iştirak edə bilər.