Qəbələ RLS-in ərazisində enerji təchizatı sistemi yenilənir

İlk xəbər saat 17:12-də verilib

“Qəbələ Radiolokasiya Stansiyasının İnzibati Təsərrüfat Zonası və Texniki Mövqe” MMC RLS-in ərazisində elektrik enerji təchizatı sisteminin təmiri, bərpası, qəzaların aradan qaldırılması, profilaktik tədbirlərin görülməsi, fasiləsiz enerji təchizatının təmin edilməsi ilə bağlı elan etdiyi açıq tenderə yekun vurub.

"Report" vahid dövlət satınalmaları portalına istinadən xəbər verir ki, tenderin qalibi "AzərTranss" MMC-dir.

Qalib şirkətə 249,3 min manat ödəniləcək.

Xatırladaq ki, Qəbələ RLS 1985-ci ildə inşa edilib, 2013-cü ilə qədər Rusiyanın Müdafiə Nazirliyinin istismarında, 2013-2014-cü illərdə Azərbaycanın Müdafiə Nazirliyinin, ondan sonra isə dövlət əmlakı kimi Əmlak Məsələləri Dövlət Komitəsinin (indiki İqtisadiyyat Nazirliyi yanında Əmlak Məsələləri Dövlət Xidmətinin - ƏMDX) balansında olub. Yeri gəlmişkən, stansiyanın idarə edilməsi ilə məşğul olan “Qəbələ Radiolokasiya Stansiyasının İnzibati Təsərrüfat Zonası və Texniki Mövqe” də Dövlət Xidmətinə məxsusdur və bu il şirkətə dövlət büdcəsindən 1,2 milyon manat vəsait ayrılıb.

***

Məsələ ilə bağlı ƏMDX-dən "Report"a bildirilib ki, tender cari təmir işlərinin aparılması ilə əlaqədar keçirilib. Stansiyanın yenidən idarəetməyə verilməsi nəzərdə tutulmur.