Azərbaycanda dəniz nəqliyyatı ilə daşınmış yüklərin həcmi 9 %-ə yaxın azalıb

Bu ilin yanvar-iyun aylarında Azərbaycanda dəniz nəqliyyatı ilə daşınmış yüklərin həcmi 4 milyon 125,7 min ton təşkil edib və əvvəlki ilin müvafiq dövrünə nisbətən 8,6 % azalıb.

“Report” Dövlət Statistika Komitəsinə istinadən xəbər verir ki, yüklərin 48,7 %-ni neft yükləri təşkil edib.

Dəniz limanları tərəfindən 6 milyon 852,1 min ton həcmində yükləmə-boşaltma işləri həyata keçirilib və yüklərin 5 milyon 487,9 min tonunu və ya 80,1 %-ni tranzit yüklər təşkil edib.

2024-cü il iyul ayının 1-i vəziyyətinə limanlarda qalan yüklərin həcmi 303,8 min ton olub.

Bu nəqliyyat növü ilə daşınmış sərnişinlərin sayı 2023-cü ilin müvafiq dövrünə nisbətən 27,6 % artaraq 13,4 min nəfər olub.