Özbəkistanlı nazir müavini: "İKT sahəsində birgə investisiya layihələrinə ehtiyac var"

İKT sahəsində region ölkələrinin birgə investisiya layihələri həyata keçirməsinə ehtiyac var.

"Report" xəbər verir ki, bunu Özbəkistanın rəqəmsal texnologiyalar nazirinin birinci müavini Olimjon Umarov "PAŞA Holding" MMC-nin təşkilatçılığı ilə Bakıda keçirilən "INMerge" İnnovasiya Sammitində bildirib.

Onun sözlərinə görə, hazırda informasiya texnologiyaları sahəsində regional əməkdaşlıq Özbəkistan üçün mühüm əhəmiyyət kəsb edir: "Söhbət startaplar, rəqəmsal layihələrdən gedir. Bundan başqa, rəqəmsal sahə ilə bağlı maneələri də aradan qaldırmalıyıq".

O qeyd edib ki, bununla bağlı ölkələrin qanunvericilikləri təkmilləşdirməlidir: "Üstəlik, informasiya texnologiyaları sahəsində məlumat mübadiləsinin aparılacağı, təlimlərin keçiriləcəyi regional proqramlar olmalıdır".