Azərbaycanlıların yaratdığı startap Sinqapurun dəniz nəqliyyatındakı tıxacı 20 % azalda bilər

Azərbaycanlıların yaratdığı dəniz texnologiyaları startapı “MagicPort” (www.magicport.ai) Sinqapurda ekoloji layihənin əsas tərəfdaşlarından biri seçilib.

Bu barədə məlumatı “Report”a startapın yaradıcısı və Baş İcraçı Direktoru (CEO) Əli Qara təsdiq edib.

Onun sözlərinə görə, Sinqapurda yaradılan dənizkənarı ekosistemin dayanıqlılığını artırmaq üçün qurulmuş təşəbbüsə “MagicPort”la yanaşı 11 aparıcı gəmiçilik və texnologiya şirkəti də qoşulub. Bununla bağlı bir neçə gün bundan əvvəl Sinqapur Dəniz Həftəsi çərçivəsində rəsmi tədbir keçirilib. Tədbirə Sinqapurun maliyyə və nəqliyyat naziri Çi Honq Tat da qatılıb.

Təşəbbüs, gəmilərin elektrikləşdirməsi və loqistika əməliyyatlarının optimallaşdırılması vasitəsilə dekarbonizasiyanı sürətləndirməyi hədəfləyir; bu məqsədlə oxşar düşüncəli sənaye oyunçularını birləşdirir, Sinqapur sahili boyunca Malakka Boğazından keçən çox sayda böyük gəmilərə xidmət edən kiçik gəmilər, qayıqlar və əlaqəli infrastrukturun elektrikləşdirilməsini hədəfləyir. Bu təşəbbüs çərçivəsində sifariş verilən sıfır emissiyalı elektrik gəmiləri dünya miqyasında indiyə qədər sifariş edilən ilk və ən böyük elektrik gəmilərindən olacaq.

“MagicPort” digər iştirakçılarla birlikdə çalışaraq müxtəlif loqistika oyunçularını birləşdirən, planlaşdırma və cədvəlləşdirmə həlləri ilə əməliyyat optimallaşdırmasına imkan yaradan rəqəmsal əməkdaşlıq platforması qurur. Bu cür rəqəmsal platforma sayəsində əldə olunan optimallaşdırma daha böyük elektrik gəmilərinin iqtisadi səmərəli istifadəsinə imkan verəcək. Bu cür rəqəmsal həllər Sinqapur sularındakı dəniz nəqliyyatındakı tıxacı 20% azalda bilər.

“Liman ekosistemində bütün iştirakçılar üçün görünuşü artıran və əməliyyatları təkmilləşdirməyi hədəfləyən bir əməkdaşlıq platforma yaradırıq. Sinqapurda sahil ekosistemini elektronlaşdırmaq və karbonsuz hala gətirmək üçün bu böyük təşəbbüsdə eyni fikirli böyük oyunçularla tərəfdaşlıqdan həyəcan duyuruq. Ümid edirik ki, bunu gələcəkdə nümunəvi bir layihə kimi, öz ölkəmiz Azərbaycanda və Türkiyədə, xüsusilə də çox gəminin keçdiyi Istanbul Boğazında da təkrarlaya bilərik”, - deyə Ə.Qara qeyd edib.