Azərbaycanda beynəlxalq poçt göndərişlərinin həcmi 10 %-dan çox azalıb  

Bu ilin yanvar-noyabr aylarında Azərbaycanda beynəlxalq poçt göndərişlərinin dəyəri 64 milyon 819 min ABŞ dolları, həcmi isə 261,9 ton təşkil edib.

“Report” Dövlət Gömrük Komitəsinə istinadən məlumat verir ki, bunlar ötən ilin eyni dövrü ilə müqayisədə müvafiq olaraq 12 % və 10,6 % azdır.

11 ay ərzində Azərbaycana xarici ölkələrdən 62 milyon 110,4 min ABŞ dolları dəyərində 255,6 ton poçt göndərişi idxal edilib ki, bu da 1 il əvvələ nisbətən müvafiq olaraq 11,6 % və 10,2 % azdır.

Hesabat dövründə Azərbaycandan xaricə isə 2 milyon 708,6 min ABŞ dolları dəyərində 6,3 ton poçt göndərişi ixrac edilib ki, bu da illik müqayisədə 21,6 % və 24,88 % azdır.