Zaqatalada yüksək dağlıq ərazidə baş verən yanğın 10 hektar ərazini əhatə edir

Zaqatala rayonunun Yuxarı Tala kəndi ərazisində, yüksək dağlıq ərazidə baş verən yanğının söndürülməsi üçün Fövqəladə Hallar Nazirliyinin (FHN) 2 helikopteri yanğınsöndürmə işlərini davam etdirir.

"Report"un Şimal-qərb bürosunun məlumatına görə, FHN-in 100 nəfər şəxsi heyəti, habelə Ekologiya və Təbii Sərvətlər Nazirliyinin əməkdaşları və yerli sakinlərdən ibarət daha 100 nəfər yanğının söndürülməsində iştirak edir.

Zaqatala Dövlət Yanğından Mühafizə Hissəsinin rəis müavini Nurlan Şabanov "Report"un yerli bürosuna bildirib ki, yanğın 10 hektar ərazini əhatə edir. Yanğın nəticəsində kol-kos, qurumuş ot və yıxılmış ağaclar yanır.

Hazırda yanğın davam edir.