"Sportinq" Simeon Slavçevi "Qarabağ"a havayı verib

Bakı. 26 sentyabr. REPORT.AZ/ "Qarabağ"ın Avropa Liqasının qrup mərhələsindəki rəqiblərindən olan Portuqaliya "Sportinq"inin yay transfer pəncərəsində xərclədiyi məbləğ müəyyənləşib.

"Report" "A Bola"ya istinadən xəbər verir ki, Lissabon təmsilçisi yeni mövsümün əvvəlində heyətinə qatdığı oyunçulara 20.75 milyon avro sərf edib. Komanda ən böyük məbləği "Qarabağ"la oyunda bir qol və məhsuldar ötürmə ilə yadda qalan Rafinya üçün verib. "Sportinq" 22 yaşlı hücümçudan ötrü "Vitoriya Gimaraynş"a 6.5 milyon avro ödəyib.

"Şirlər" Emiliano Viviano üçün 2 milyon avro, Brunu Qaşpar və Abdulay Diabi üçün 4.5 milyon avro, Nemanya Qudel üçün 3 milyon avro və Renan Ribeyro üçün 250 min avro ödəyib.

Komanda ulduz futbolçusu Luiş Nani və Merselo dos Santosun transferindən ötrü xərcə düşməyib. 

"Sportinq" həmçinin yay transfer pəncərəsində "Qarabağ"ın heyətinə qatdığı Simeon Slavçev və İspaniya "Jirona"sına keçən Seydu Dumbiyanın transferindən gəlir əldə edə bilməyib. Lissabon klubu əmək haqqı ödəməmək üçün onları pulsuz buraxıb. 

Qeyd edək ki, "Sportinq" 2017-2018 mövsümünün yay transfer pəncərəsində 44.5 milyon avro xərcləyib.