Yuxarı

Bolqarıstanlı hücumçunun "Qəbələ"yə keçidi baş tutmayıb

Bolqarıstanlı hücumçunun "Qəbələ"yə keçidi baş tutmayıb

Oyunçu Partizanın Qəbələdən böyük məbləğdə transfer haqqı istəməsini səbəb göstərib

Bakı. 22 yanvar. REPORT.AZ/ Serbiyanın "Partizan" klubunun futbolçusu Valeri Bojinovun "Qəbələ"yə keçidi baş tutmayıb.

"Report"un məlumatına görə, bu barədə 31 yaşlı hücumçunun özü açıqlama verib.

Bolqarıstanlı oyunçu "Partizan"ın "Qəbələ"dən böyük məbləğdə transfer haqqı istəməsini səbəb göstərib. O, hazırda Sloveniyada təlim-məşq toplanışında olan komandasının düşərgəsinə yollanacağını və hədəfinin çempionluq olduğunu söyləyib.

Bolqarıstan mətbuatı da Bojinovun "Qəbələ"yə keçidinin son anda baş tutmadığını yazıb. Hətta bildirilir ki, təcrübəli futbolçu Azərbaycan klubuna mümkün keçidi ilə əlaqədar Belqradda qalıb və əşyalarını toplamağa başlayıb. Amma transferi alınmadığından sonra Sloveniyada hazırlıq keçən "Partizan"ın düşərgəsinə qoşulmalı olub.

Futbolçuya Türkiyə, Yunanıstan və Yaponiyadan da təkliflər olub. Lakin həmin təkliflər də klubların razılığa gələ bilməmələri səbəbindən gerçəkləşməyib. 

Qeyd edək ki, Valeri Bojinov əvvəllər İtaliyanın "Leççe", "Fiorentina", "Yuventus", "Parma", İngiltərənin "Mançester Siti" və Portuqaliyanın "Sportinq" kimi məşhur klublarının formasını geyinib. O, 2015-ci ilin yayından çıxış etdiyi "Partizan"da 51 oyuna 23 qol vurub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Tərəfdaşların xəbərləri


Xəbər lenti

Son xəbərlər



Orphus sistemi