Zaur Axundov: "Məşqçilər heyətinin səyləri nəticəsində "Keşlə" pik nöqtəyə çatacaq"

Bakı. 4 mart. REPORT.AZ/ "Ağır oyun oldu. Təbii ki, əsas olanı nəticə idi. Komandanı təbrik edirəm. Yaxşı, əzmkar oyun sərgilədilər. "Neftçi" ilə növbəti oyuna hazırlaşacağıq".

"Report" xəbər verir ki, bunu "Keşlə"nin prezidenti Zaur Axundov səfərdə "Zirə"ni 2:1 hesabı ilə yendikləri Azərbaycan Premyer Liqasının XVIII tur matçından sonra deyib. Axundov jurnalistlərin digər suallarını da cavablandırıb...

Hələlik komandanız evdə yox, səfərdə qələbələr qazanır...

- Bizə 3 xal lazım idi. Bunu da qazandıq. Təbii ki, bu məqam da böyük amildir. Ümidvaram ki, növbəti oyunlarda doğma meydanda da azarkeşlərimizi sevindirəcəyik.

Komandanızın çıxışı sizi razı salırmı və oyundan-oyuna artım hiss edirsiniz?

- Oyundan-oyuna artım var. Düzdür, orta xətdə boşluqlar da nəzərə çarpır. Lakin futbolçularımız tədricən artırırlar. Düşünürəm ki, 1-2 tura komandamız tam hazır vəziyyətə çatacaq.

Mətbuatda yeni transferlərdən narazı olduğunuz və buna görə baş məşqçi Yuri Maksimova irad bildirdiyiniz yazılmışdı. Belə bir hal həqiqətən də olub?

- Xeyir, belə bir şey yoxdur. Bu xəbəri yazan sayt mənim üçün sıfırdır, boşluqdur. Ona heç fikir də vermirəm. 2-3 gün əvvəl yazmışdılar ki, Yuri Maksimov gedib. Halbuki Maksimov həmin vaxt məşqdə idi. Komandamız oyununu davam etdirir. Təkcə Maksimov deyil, seleksiya üzrə məşqçilərin də birgə məsləhətləşmələri ilə transferlər həyata keçirilib. Zaur Axundov transfer etmir. Transferlərə baş məşqçi və köməkçiləri cavabdehdirlər. Mən "O gəlsin, bu getsin" kimi məsələlərə qarışmıram.

Bu heyətlə Azərbaycan Kubokunu qazanmaq realdır?

- Futbolda hər şey ola bilər. Amma komandamız hələlik potensialının 50 faizini oynayır. Yaxşı haldır ki, kubok oyunumuzadək hələ var. Məncə, məşqçilər heyətimizin səyləri nəticəsində "Keşlə" pik nöqtəyə çatacaq. Təki zədələrimiz olmasın. Qarşıda hələ çempionat oyunlarımız var. Oynamalı və nəticə göstərməliyik.