Yoldaşlıq görüşü: İtaliya Ekvador üzərində inamlı qələbə qazanıb

İtaliya və Ekvador milliləri arasında baş tutan yoldaşlıq görüşü avropalıların inamlı qələbəsi ilə başa çatıb.

“Report” xəbər verir ki, ABŞ-nin Nyu-Cersi ştatındakı “Redd Bull Arena”da baş tutan matçı amerikalı hakimlər briqadası idarə edib.

“Roma”nın yarımmüdafiəçisi Lorentso Pelleqrini 3-cü dəqiqədə İtaliyanı hesabda irəli çıxarıb. Növbəti qol isə 90+4-cü dəqiqədə vurulub. Milan “İnter”inin yarımmüdafiəçisi Nikolo Barella fərqlənərək yekun hesabı müəyyənləşdirib – 2:0.

Xatırladaq ki, martın 22-də İtaliya millisi Venesuela ilə yoldaşlıq oyunu keçirib (2:1). Həmin gün Ekvador Qvatemala komandasına 2:0 hesabı ilə qalib gəlib.