Vaqif Sadıqov: "Qurban Qurbanov yığmalara təyinatlar zamanı AFFA Məşqçilər Komitəsini də dinləyəcək"

Bakı. 10 noyabr. REPORT.AZ/ “Müxtəlif yaş qrupları üzrə milli komandalara baş məşqçilər təklif olunan zaman ümumi müzakirə aparılmalıdır. Mövzu yığmalardırsa, bütün sağlam qüvvələr birləşməlidir”. Bunu “Report”a açıqlamasında AFFA Məşqçilər Komitəsinin sədri Vaqif Sadıqov deyib.

V.Sadıqovun sözlərinə görə, Qurban Qurbanovun Azərbaycanın əsas milli komandasının baş məşqçisi təyin olunmasından və aşağı yaş qrupları üzrə yığmaların onun sərəncamına verilməsindən sonra yeni təyinatlarla bağlı AFFA Məşqçilər Komitəsi ilə də müzakirə aparılacaq: “Qurban Qurbanova aşağa yaş qrupları üzrə millilərə yeni baş məşqçi namizədləri ilə bağlı sual veriləndə, o, bildirdi ki, AFFA rəhbərliyi ilə məsləhətləşəcək. Milli assosiasiya isə Məşqçilər Komitəsinin fikirlərini öyrənəcək. Hesab edirəm ki, Qurbanovun özü də bizim düşüncələrimizi dinləyəcək. Əlbəttə, yekun qərarı o verəcək. Bu seçimdə yanlış addım atmaq olmaz. Vahid sistemə gəlib, pillə-pillə qalxmaq üçün birlikdə çalışmalıyıq. Bu prosesdə Məşqçilər Komitəsinin də rolu önəmlidir”.

Komitə sədri 21 yaşadək futbolçulardan ibarət Azərbaycan yığmasının 2019-cu il Avropa çempionatının seçmə mərhələsində uğursuz çıxışına və son matçda Almaniya millisinə 0:7 hesabı ilə uduzmasına da toxunub. O, deyib ki, hazırkı nəsil özünü müsbət tərəfdən göstərə bilmir: “Bu futboçuların əksəriyyəti öz klublarında əsas heyətdə çıxış etmirlər və ya çox oynamırlar. Əsas yığmanın ən yaxın ehtiyat qüvvəsində yetərincə problemlər var. Lakin bunların arada qaldırılacağına inanıram. Almaniya ilə matçda uşaqlar nizam-intizamı qorumaq üçün nə qədər çalışsalar da, nəticə üçün səviyyə çox önəmlidir. Təəssüf ki, hazırkı futbolçu nəsli səviyyə baxımından əvvəlkilərdən qat-qat zəifdir. Hədəflərimiz yüksək olsa da, böyük nəticələrə ümid bəsləmək olmaz. İnanıram ki, Qurbanovun gəlişindən, yığma-klub sisteminin bərpasından sonra vəziyyət dəyişəcək. Mövcud duruma görə ayrılıqda kimlərisə günahlandırmaq olmaz. Bu, ümumi bəlamızdır. Nəticələr acınacaqlıdır”.

Samir Ələkbərovun 21 yaşadək futbolçulardan ibarət Azərbaycan millisinin oktyabr və noyabr aylarında keçirəcəyi oyunlar üçün müvəqqəti olaraq baş məşqçisi vəzifəsinə təyinatı Məşqçilər Komitəsinin tövsiyyəsi ilə baş tutub. V.Sadıqov hesab edir ki, nəticələr ürəkaçan olmasa da, yeniliklər var: “Yığmanı Samir Ələkbərova həvalə etmək ondan irəli gəlirdi ki, xeyli vaxtdır U-21-də işəyir, futbolçuları tanıyır. Bu səbəbdən, ona tapşırmağı uyğun gördük. Nəticəyə baxmayaraq bəzi yeniliklər görə bilirik. Komanda nizam-intizamlı oynayır. Lakin görürük ki, yığma hələlik yenilikləri həyata keçirməyə qadir deyil. Futbolda nəticə əsas götürülür. Nəticələr isə ürəkaçan deyil”.