"Sumqayıt" "Qarabağ"dan ayrılan futbolçu ilə müqavilə bağlayıb

Bakı. 6 avqust. REPORT.AZ/ 2018/2019 mövsümü üçün transfer çalışmalarını davam etdirən "Sumqayıt" klubu daha bir futbolçunu heyətinə cəlb edib.

"Report" klubun saytına istinadən xəbər verir ki, son mövsümü “Qarabağ"da keçirmiş sağ cinah müdafiəçisi Arif Daşdəmirovla 1 illik müqavilə imzalanıb. 31 yaşlı futbolçu yeni komandasında 21 nömrəli formada çıxış edəcək.

Qeyd edək ki, Daşdəmirov karyerası ərzində “Qarabağ”dan (15 oyun) başqa “Şahdağ” (19 oyun, 2 qol), “MKT Araz” (22 oyun, 2 qol), “Masallı” (20 oyun, 1 qol), AZAL (10 oyun), “Standard” (16 oyun), “Qəbələ” (48 oyun, 1 qol) və “İnter”in (139 oyun, 9 qol) uğurları üçün çalışıb.