"Sabah"ın mümkün rəqiblərinin oyununda qalib müəyyənləşməyib

"Sabah"ın UEFA Konfrans Liqasının pley-off mərhələsindəki potensial rəqiblərinin III raunddakı ilk oyununda qalib müəyyənləşməyib.

"Report"un məlumatına görə, Rumıniyada "Styaua" və Danimarka "Norşellann"ı arasında keçirilən qarşılaşma qolsuz bərabərliklə başa çatıb.

Qonaqlar 59-cu dəqiqədə azlıqda qalıblar. Adamo Naqalo ikinci sarı vərəqəni alaraq meydandan qovulub.

Qeyd edək ki, bu cütün qalibi pley-off mərhələsində "Sabah" - "Partizan" (Serbiya) duelinin güclüsünə rəqib olacaq. Bakı klubu evdə Belqrad təmsilçisinə qarşı keçirdiyi III raundun ilk matçında 2:0 hesablı qələbə qazanıb.