Çempionlar Liqasının qalibi: Bizi dəstəkləyən azarkeşlərə təşəkkürümü bildirirəm

Azərbaycanın “Birbaşa Bakı” minifutbol klubunun idmançısı Rizvan Fərzəliyev Çempionlar Liqasının finalında dəstək olan azərbaycanlı azarkeşlərə təşəkkürünü bildirib.

“Report” xəbər verir ki, bu barədə minifutbolçu hava limanında jurnalistlərə açıqlamasında bildirib.

“Ardıcıl üçüncü dəfə Çempionlar Liqasına qatılmışdıq. İki dəfə uğursuzluğumuz oldu, yarı yolda qaldıq. Ancaq bu dəfə, üçüncü dəfə qatılanda hədəfimizə nail olduq və Bakıya kubokla qayıtdıq. Bizə dəstək olan, bizim üçün əziyyət çəkən hər kəsə təşəkkürümü bildirirəm”, – o qeyd edib.

“Oyunda azsaylı azarkeş qrupumuz da var idi. Onların ümidlərini doğrultduq, onlara minnətdaram”, – o vurğulayıb.

Qeyd edək ki, Polşanın paytaxtı Varşavada keçirilən Çempionlar Liqasının qalibi olmuş Azərbaycanın minifutbol üzrə “Birbaşa Bakı” komandası vətənə qayıdıb.

Xatırladaq ki, Dani Marius Mitunun yetirmələri Çempionlar Liqasının finalında Çexiyanın “Brno” komandasını minimal fərqlə üstələmişdilər – 2:1. Azərbaycan təmsilçisi finala gedən yolda Ukraynanın “Andezit” komandasının öhdəsindən gəlmişdi.