"Qalatasaray" Fatih Terimə verilən cəzaya kəskin etiraz etdi

Türkiyənin "Qalatasaray" klubu baş məşqçisi Fatih Terimə verilən beş oyunluq cəzaya etirazını bildirib.

"Report" xəbər verir ki, İstanbul təmsilçisi etirazını rəsmi tvitter hesabından paylaşıb.

Klub 67 yaşlı mütəxəssisin cəzasının ədalətli olmadığını yazıb: "Türkiyə futbolunda çirkin oyunlar oynanılır, qərarın komandamızı çempionluq yarışından uzaqlaşdırmaq üçün məqsədyönlü şəkildə qəbul edildiyi aşkardır. Koronavirus səbəbindən karantin müddəti bitən kimi məşqə çıxmayan hakim oyunumuza təyinat aldı. Sona qədər mübarizəmizi aparacağıq".

Qeyd edək ki, Fahit Terim Türkiyə Super Liqasının XII turunda "Fatih Karagümrük"lə matçda qırmızı vərəqə alıb. O, eferi Mustafa Öğretmenoğluna etiraz edib və hakimə qarşı davranışı ilə əlaqədar texniki zonadan kənarlaşdırılıb.

Terimə diskvalifikasiyadan əlavə, 55 500 lirə cərimə də kəsilib. Təcrübəli mütəxəssis ötən tur "Göztepe" ilə matçda komandasının sükanı arxasında olmayıb. O, "Trabzonspor", "Antalyaspor", "Konyaspor" və "Gənclərbirliyi" ilə qarşıdakı turun oyunlarında da kənarda qalacaq.