Premyer Liqa: "Sumqayıt" avtoqol sayəsində "Səbail"ə qalib gəlib

Azərbaycan Premyer Liqasında XVIII turun daha bir oyunu keçirilib.

“Report”un məlumatına görə, günün ikinci görüşü Sumqayıtda baş tutub.

Şəhərin eyniadlı komandası “Səbail”i qəbul edib.

Qarşılaşmanın taleyini avtoqol həll edib. "Səbail"in oyunçusu Adi Mehremiçin 70-ci dəqiqədə öz qapılarından keçirdiyi top "Sumqayıt"a 1:0 hesablı qələbə qazandırıb. Bu qalibiyyət sayəsində xallarının sayını 27-yə çatdıran Samir Abasovun yetirmələri 3-cü pilləyə yüksəliblər. Hesabında 26 xal olan Şahin Diniyevin kollektivi isə 4-cü yerə düşüb.

Qeyd edək ki, tura dekabrın 24-də keçiriləcək "Turan Tovuz" - "Araz-Naxçıvan" (81-ci dəqiqədən), “Neftçi” – “Kəpəz” və “Zirə” – “Qarabağ” oyunları ilə yekun vurulacaq.