"Mançester Yunayted"in təlim-məşq mərkəzində 200 min funt-sterlinqlik divar tikilib

İngiltərənin "Mançester Yunayted" klubunun Karrinqtondakı təlim-məşq mərkəzində komandanın məşqlərini gizlətmək və oyunçuları əlverişsiz havadan qorumaq üçün nəhəng ağ divar tikilib.

"Report" "Daily Mail"ə istinadən xəbər verir ki, hasarın tikilməsi kluba 200 min funt-sterlinqə başa gəlib.

Divar "qırmızı şeytanlar"ın baş məşqçisi Erik ten Haqın xahişi ilə tikilib. 250 nəfərin işdən çıxarılmasından sonra inşa olunan qurğunun dəyəri klub əməkdaşlarında çaşqınlıq yaradıb.

Qeyd edək ki, "Mançester Yunayted" İngiltərə Premyer Liqasında 7 turdan sonra 8 xalla 14-cü yerdə qərarlaşıb.