Kvaratsxeliya "Bavariya"nın maraq dairəsində

Almaniya "Bavariya"sı Gürcüstan millisinin və Rusiya "Rubin"in futbolçusu Xviça Kvaratsxeliya ilə yaxından maraqlanır.

"Report" "express.de" saytına istinadən xəbər verir ki, heyəti gəncləşdirmək istəyən Münhen klubunun əsas transfer hədəflərindən biri 20 yaşlı hücumameylli yarımmüdafiəçidir.

Qeyd edək ki, bu mövsüm Kazan təmsilçisinin heyətində 20 oyun keçirmiş istedadlı vinger 3 qol vurub. Kvaratsxeliya DÇ-2022-nin martdakı oyunlarında İspaniya və Yunanıstan yığmalarının qapısına da yol tapıb.

O, Azərbaycan millisinin sabiq futbolçusu Badri Kvaratsxeliyanın oğludur.