Dünya və Avropa çempionu klubunu tərk edəcək

İspaniya millisinin heyətində dünya çempionu və ikiqat Avropa çempionu olan Serxio Ramos mövsümün sonunda “Sevilya”nı tərk edəcək.

“Report”un “Relevo”ya istinadən məlumatına görə, 38 yaşlı müdafiəçi maddi durumla əlaqədar bu addımı atmağı planlaşdırır.

La Liqa təmsilçisi də ona yaya qədər olan müqavilənin müddətini uzatmağı təklif etməyib. İspaniya klubu maliyyə feyr-pley qaydalarına əməl etmək üçün maaş büdcəsini azaltmalı olacaq. Daha az məvacibə müsbət yanaşmayan ulduz futbolçu yeni klub axtarışlarına başlayıb.

Qeyd edək ki, Serxio Ramos bu mövsüm bütün turnirlərdə 29 oyuna çıxıb, 7 qol vurub.