Bu gün "Barselona” və "Real” 11 ildən sonra Ronaldu və Messisiz qarşılaşacaq

Bakı. 28 oktyabr. REPORT.AZ/ Bu gün İspaniya La Liqasının X turunda əzəli rəqiblər - "Barselona” və "Real Madrid” qarşılaşacaq.

"Report"un məlumatına görə, 2007-ci ildən bu yana "El Klasiko"da ilk dəfə Lionel Messi və Kriştianu Ronaldudan hər hansı biri olmayacaq.

Ronaldu İtaliya "Yuventus”una transfer olub, Messi isə zədə səbəbindən bu oyunda iştirak edə bilməyəcək. Kataloniya təmsilçisində Samüel Yumtiti və Tomas Vermalen, "Kral klubu”nda isə Daniel Karvaxal və Mariano Diasın durumu matç saatlarında dəqiqləşəcək.

Bu mövsüm hər iki komanda gözlənilən səviyyədə çıxış etmir. Buna baxmayaraq, Kataloniya klubu IX turu 18 xalla lider mövqeyində başa vurub. Ernesto Valverdenin komandası "El Klasiko"da qələbə qazana bilməsə, X turun yekununda La Liqada lider dəyişəcək. Artıq "Atletiko Madrid” X turun ilk günündə doğma meydanda "Real Soseydad”a qalib gələrək xallarını 19-a çatdırıb. Mövsümə Xulen Lopeteginin rəhbərliyi altında başlayan "Real Madrid” isə 9 turdan sonra 14 xalla 7-ci yerdə qərarlaşıb.

"Nou Kamp" stadionunda Bakı vaxtı ilə saat 19:15-də başlanacaq "El Klasiko"nu Xose Mariya Sançes Martines idarə edəcək.

1916-cı ildən etibarən iki komanda arasında 237 rəsmi oyun keçirilib. "El Klasiko"da 95 dəfə "Real Madrid”, 93 dəfə "Barselona” qələbə qazanıb. Daha 49 matçda qalib müəyyənləşməyib. Topların nisbəti də "Kral klubu"nun xeyrinədir - 401:387.

Bundan əvvəl "Barselona"nın baş məşqçisi "El Klasiko"nun Messi və Ronaldusuz maraqsız olmayacağını bildirib.