İnterpol Azərbaycanda qanunsuz mərc edənləri aşkarlayıb

İnterpol futbol üzrə Avropa çempionatı vaxtı qanunsuz mərc oyunlarından milyonlar qazanmağa çalışan və çirkli pulların yuyulması üzrə fəaliyyətdə əlləri olan mütəşəkkil cinayətkar qruplara qarşı əməliyyat keçirib.

"Report"un qurumun rəsmi saytına istinadən verdiyi məlumatına görə, cinayətkar qrupların fəaliyyətinin izlənildiyi 28 ölkə arasında Azərbaycan da yer alıb.

"SOGA VIII" əməliyyatı Asiya və Avropada 1400-dək şübhəli şəxsə qarşı minlərlə reyd və həbslə nəticələnib. 7,9 milyon ABŞ dolları nəğd pul, habelə, 465 milyon dollar pul qoyuluşu edilən kompüterlər, mobil telefonlar müsadirə edilib.

Əməliyyatı İnterpolun maliyyə cinayətləri və korrupsiya üzrə mübarizə şöbəsi Asiya və Sakit Okean Eskpert Qrupunun dəstəyi ilə həyata keçirilib.

Honq Konq polisi 800 şübhəli şəxsi saxlayıb. Onlardan 2,7 milyon ABŞ dolları nəğd pul müsadirə edilib. Bu, qeyri-qanuni azart oyunları ilə mübarizə tarixinin ən uğurlu əməliyyatı olub. "SOGA VIII" əməliyyatında Avropa ölkələri, habelə bir sıra hüquq-mühafizə orqanları ən fəal iştirak ediblər.

İnterpolun iqtisadi və maliyyə cinayətkarlığına qarşı mübarizə bürosunun direktoru Roberto Ribaldo bildirib ki, yoxlamaya məruz qalan 285 bukmeyker kontorlarına qeyri-qanuni pul qoyuluşuna görə 1,5 milyon avro sanksiya tətbiq edilib.

Əməliyyat onlayn fəaliyyət istiqamətində açıq-aşkar irəliləyişin olduğunu üzə çıxarıb. Cinayətkar qruplar maliyyə texnologiyaları, o cümlədən azart oyunlarına həsr edilmiş beynəlxalq saytlar və onlayn bank hesablarından tam istifadə ediblər. Əməliyyatı Cənubi Koreya maliyyələşdirib. Bu günədək SOGA əməliyyatı 19 mindən çox həbsə gətirib çıxarıb və 63 milyon dollardan çox nəğd pul müsadirə olunub. Həmçinin ümumilikdə 7,3 milyard dollar vəsaitin dövr edildiyi 400-dən çox qeyri-qanuni oyun zalı bağlanılıb.

İştirakçı ölkələr bunlardır: Avstriya, Azərbaycan, Bəhreyn, Belçika, Bruney, Kamboca, Çin, Xorvatiya, Çexiya, Finlandiya, Fransa, Almaniya, Macarıstan, Hindistan, İrlandiya, İtaliya, Malaziya, Maldiv adaları, Filippin, Polşa, Portuqaliya, Rumıniya, Rusiya, Sinqapur, İspaniya, İsveçrə, Böyük Britaniya, Vyetnam.

Qeyd edək ki, AVRO-2020 12 iyun - 12 iyulda keçirilib. A qrupunun 3 oyunu ilə yanaşı, 1/4 final qarşılaşmalarından 1-i Bakı Olimpiya Stadionunda gerçəkləşib.