Azərbaycan millisinin hücumçusu yubiley qolunu vurub

Bakı. 21 dekabr. REPORT.AZ/ “Keşlə”nin futbolçusu Amil Yunanov Azərbaycan Premyer Liqası və ölkə kubokunda ümumilikdə 40-cı qolunu vurub.

"Report" Peşəkar Futbol Liqasının saytına istinadən xəbər verir ki, 25 yaşlı hücumçunun yubiley qolu Azərbaycan Kubokunun 1/4 final mərhələsinin “Qarabağ”la cavab oyununa (1:1) təsadüf edib. Azərbaycan millisinin üzvü bu qollardan 33-nü Premyer Liqa, 7-ni Azərbaycan kubokunda vurub.

Qol hesabını 2011/12 mövsümündə “Qəbələ”də çıxış etdiyi vaxt açan Yunanov “Sumqayıt”da daha çox fərqlənib. O, bu klubda 28 dəfə çempionat, 6 dəfə kubokda rəqib qapısına yol tapıb. “Keşlə”də 5-ci qolunu vuran forvard 4 dəfə Premyer Liqada fərqlənibsə, yeni klubunda ilk kubok qoluna sevinib.