Azərbaycanda üzgüçülük üzrə beynəlxalq yarışlar keçiriləcək

Bakı. 1 noyabr. REPORT.AZ/ Bu gün Gənclər və İdman Nazirliyində Avropa Üzgüçülük Federasiyası (LEN) ilə Azərbaycan Üzgüçülük Federasiyası (AÜF) arasında deklorasiyanın imzalanmasına dair mərasim keçirilib.

“Report” xəbər verir ki, tədbirdə gənclər və idman naziri Azad Rəhimov, LEN-in prezidenti Paolo Barelli, AÜF-ün prezidenti Xanlar Fətiyev və digər rəsmi şəxslər iştirak ediblər.

A.Rəhimov bildirib ki, P.Barelli LEN ilə yanaşı, İtaliya Üzgüçülük Federasiyasının da prezidenti olduğundan, iki ölkənin milli federasiyaları arasında da gələcək üçün zəruri danışıqlar aparılıb. Nazirin fikrincə, Azərbaycanda su idman növlərinə təkan verə biləcək razılıqlar əldə olunub: “Bu gün əməkdaşlığın sıx formada aparılması üçün müqavilə bağlanacaq. Bu, yalnız üzgüçülüklə bağlı deyil, bütün su idman növlərini əhatə edəcək. Cənab Barelli ilə Azərbaycanda beynəlxalq yarışların keçirilməsi də müzakirə olunub. Ölkə rəhbərliyinə məruzədən sonra hansı yarışların nə vaxt təşkil edilə biləcəyini açıqlayacağıq”.

P.Barelli isə deyib ki, tərəflər arasında uzunmüddətli əlaqələr qurulub. O, Azərbaycanda üzgüçülük sarıdan böyük potensialın olduğunu söyləyib: “Burada önəmli bir qurğu – Su İdman Sarayı var. Gələcəkdə Azərbaycandan olan idmançıların Avropada öncül sıralarda olmalarını istərdik. Bu müqavilə gələcək əməkdaşlıq üçün təməldir. İstərdik ki, İtaliya və Azərbaycan idmançıları birgə toplanışlar keçsinlər. Həmçinin, məşqçilər və hakimlər də müştərək yarışlarda iştirak etsinlər. Azərbaycanda tezliklə böyük turnirlərin təşkil olunmasını arzulayıram”.

X.Fətiyev isə Azərbaycanda 40-dan çox Olimpiya Kompleksinin olmasına və Su İdman Sarayının xüsusi önəm daşımasına diqqət çəkib: “Hazırda 1200 nəfərdən çox idmançı bu kompleksdə məşq edir. Ümumilikdə isə su idman növləri ilə məşğul olanların sayı 5 mindən çoxdur”.

Tədbirin sonunda LEN və AÜF prezidentləri əməkdaşlıqla bağlı deklorasiya imzalayıblar.