Avropa çempionatı: Azərbaycan ağırlıqqaldıranı 3 medal qazanıb

Azərbaycan ağırlıqqaldıranı Tehran Məmmədov Albaniyanın Dürres şəhərində keçirilən yaşı 20 və 23-ə qədər olan gənclər arasında Avropa birinciliyində 3 medal qazanıb.

Federasiyadan "Report"a verilən məlumata görə, 61 kq çəki dərəcəsində mübarizə aparan idmançı yaşı 20-yə qədər olan iştirakçılar arasında qüvvəsini sınayıb.

"Buta" idman klubunun üzvü birdən qaldırmada 120 kq-ı ram edərək, bu hərəkətdə gümüş medala sahib çıxıb. Təkanla qaldırmada 141 kq-ı başı üzərinə qaldıran Məmmədov bu hərəkətdə 3-cü yeri tutub.

Toplam 261 kq (120+141) nəticə göstərən idmançı yekun sıralamada gümüş medal qazanıb.

Qeyd edək ki, oktyabrın 25-dək davam edəcək yarışda 37 ölkədən 416 atlet (194 qadın və 222 kişi) qüvvəsini sınayır.