SOCAR və BP işçi heyətini birgə təlimlərə cəlb edə bilər

Azərbaycan Dövlət Neft Şirkəti (SOCAR) və BP şirkəti arasında işçi heyətinin birgə təlimlərə cəlb olunması sahəsində mümkün əməkdaşlıq imkanları nəzərdən keçirilib.

Bu barədə “Report”a SOCAR-dan məlumat verilib.

Bildirilib ki, SOCAR-ın baş ofisində hasilatın pay bölgüsü sazişləri ilə tənzimlənən yerli işçi heyətinin inkişaf etdirilməsi məqsədilə illik nəzərdən keçirmə görüşü baş tutub.

SOCAR-ın vitse-prezidentləri Ziba Mustafayeva və Babək Hüseynov ilə BP-nin Azərbaycan, Gürcüstan və Türkiyə regionu üzrə vitse-prezidentləri Leyla Məmmədova və Russell Morrice arasında geniş tərkibdə keçirilən görüşdə BP şirkətinin 2023-cü il üzrə müvafiq hesabatı təqdim olunub.

Həmçinin, şirkətlər arasında mövcud əməkdaşlığın bütün istiqamətlərdə, o cümlədən yerli insan kapitalının inkişafı sahəsində uğurla həyata keçirildiyi qeyd olunub.

Qarşılıqlı faydalı əlaqələrin dayanıqlılıq prinsipləri əsasında gələcəkdə də davam etdiriləcəyinə əminlik ifadə edilib.

Görüşdə, həmçinin təcrübə mübadiləsinin əhəmiyyəti vurğulanıb.