“SOCAR-Petrofac” birgə müəssisəsi ilə BP arasında müqavilə imzalanıb

“SOCAR-Petrofac” birgə müəssisəsi (SPC) BP-nin Azərbaycan və Gürcüstanda həyata keçirdiyi əməliyyatları dəstəkləmək məqsədi ilə Layihə Menecmenti Xidmətlərinin göstərilməsi üzrə müqavilə imzalayıb.

“Report” xəbər verir ki, üç il müddətinə bağlanmış müqavilə Xəzər dənizində BP-nin əməliyyatçı olduğu layihələrdə, o cümlədən “Azəri-Çıraq-Günəşli” blokunun, “Şahdəniz” yatağının, Bakı-Tbilis-Ceyhan, Cənub Qafqaz Boru Kəməri və Qərb İxrac Kəməri layihələri çərçivəsndə quru və dəniz əməliyyatlarının dəstəklənməsini nəzərdə tutur.

“Petrofac” şirkətinin Şərq Mühəndislik, Tədarük və Tikinti bölməsinin idarəedici direktoru Mani Racapati qeyd edib ki, 15 ildən artıqdır Azərbaycanda fəaliyyət göstərən şirkət burada ixtisasartırma imkanları yaradır, ölkənin neft və neft-kimya sənayesində xidmətlər göstərir:“Biz əsas tərəfdaşımız SOCAR ilə birlikdə regionda xidmət təkliflərimizi genişləndirməkdə davam edirik. Bu bizim beynəlxalq fəaliyyətimizin güclənməsinə zəmin yaradır. Biz əvvəl də regionda BP ilə əməkdaşlıq etmişik və bu şirkətin Azərbaycanda və Gürcüstanda həyata keçirdiyi əhəmiyyətli layihələrə təhlükəsiz, etibarlı və effektiv dəstək verməyə hazırıq” .

SOCAR-ın kadr, rejim və informasiya texnologiyaları üzrə vitse-prezidenti Xalik Məmmədov bildirib ki, “Petrofac”la ilə uğurlu əməkdaşlıq qurulub və bu əməkdaşlıq genişlənməkdə davam edir: “Birgə müəssisə özündə bizim müvafiq təcrübəmizi, yerli biliklərimizi və dərin potensialımızı birləşdirir. Çox şadam ki, dünyada neft və qaz hasilatının əsas qədim məskənlərindən olan Xəzər regionunda BP ilə əməkdaşlıq istiqamətində belə bir müqavilə imzalandı”.