Səudiyyə Ərəbistanı OPEC+ anlaşmasının şərtlərini yumşalda bilər

Bakı. 26 fevral. REPORT.AZ/ Bu ilin I rübünün yekununda Səudiyyə Ərəbistanında neft hasilatının həcmi OPEC+ anlaşmasında nəzərdə tutulan kvotadan xeyli az olacaq. 

"Report" "Reuters" agentliyinə istinadən xəbər verir ki, bunu ərəb ölkəsinin energetika naziri Xalid əl-Falih deyib.

Nazir Səudiyyə Ərəbistanının gündəlik neft ixracının həcminin 7 mln. barel səviyyəsində sabit qalacağını da qeyd edib. 

"Hazırda bazarın hansı istiqamətdə irəliləməsi ilə bağlı təhlillər aparılır. Yalnız bundan sonra verdiyimiz qərarı açıqlayacağıq. Ola bilər ki, hasilatın azaldılması şərtləri yumşaldılsın. Hesablamalarımıza görə, bu, 2019-cu ildə baş verəcək",- o əlavə edib. 

Bu açıqlama, eləcə də ötən həftənin sonunda Liviyanın gündəlik 70 min barel hasilat gücünə malik olan Əl-Fil yatağında yaranmış problemlər dünya bazarında neftin bahalaşmasına gətirib-çıxarıb. Əmtəə birjalarında "Brent" markalı neftin qiyməti 67 dollar/bareli ötüb.