​Pirallahıda yeni neft yığım parkı tikilir

Bakı. 9 iyun. REPORT.AZ/ Azərbaycan Dövlət Neft Şirkəti (SOCAR) “Azneft” İstehsalat Birliyinin “Abşeronneft” NQÇİ-yə məxsus Pirallahı adasındakı köhnə neft yığım parkı yenisi ilə əvəz olunacaq.

"Report" SOCAR-a istinadən xəbər verir ki, bu məqsədlə adanın şimal-şərq hissəsində 6,4 hektar torpaq sahəsi ayrılıb, parkın tikinti işlərinə başlanılıb. “Neftqaztikinti” Tresti tərəfindən tikilən yeni neft yığım parkı texnoloji cəhətdən, ekoloji baxımdan müasirliyi və yüksək standartlara cavab verməsi ilə fərqlənəcək. Parkda 24 ədəd neft çəni quraşdırılacaq, ikimərtəbəli inzibati bina, keçid məntəqəsi, operator və alətlər otağı, yanğın əleyhinə nasosxana binası, ayrılıqda neft və lay suyu üçün nasosxana, yeraltı drenaj bloku, 4 ədəd qaz-su-qum separatoru, hava hazırlayıcı blok, 2 ədəd soba, 6/0,4 kV-luq yarımstansiya binası inşa ediləcək. 24 çəndən 3-ü 3 000, 6-sı 2 000, 4-ü 1 000, 5-i 700, 4-ü 400, 2-si isə 100 kubmetr maye tutumuna malik olacaq.

Bildirilib ki, yeni parkda əl əməyinin yüngülləşdirilməsi məqsədi ilə iş prosesi demək olar tam avtomatlaşdırılacaq. Əməyin mühafizəsi və texniki təhlükəsizlik qaydaları müasir standartlar səviyyəsində olacaq, neftçilər üçün optimal iş şəraiti yaradılacaq, ərazi abadlaşdırılacaq.