Ötən ay Azərbaycan neft emalını 21 %-dən çox artırıb

Bu ilin yanvar ayında Azərbaycanda 0,6 milyon ton neft emal edilib.

“Report” xəbər verir ki, bu barədə Energetika Nazirliyinin yanvar ay üzrə açıqladığı operativ məlumatlarında deyilir.

Bu, 2024-cü ilin ilk ayının göstəriciləri ilə müqayisədə Azərbaycanda neft emalı həcmləri 119 min ton və ya 21,4 % çoxdur.

Xatırladaq ki, 2024-cü ilin yanvar ayında ölkədə neftin emalı 481 min tona yaxın təşkil edib.

Qeyd edək ki, SOCAR-ın Heydər Əliyev adına NEZ-i regionumuzun yeganə neft emalı müəssisəsi olaraq, Azərbaycanın Ai-92, dizel və təyyarə yanacağı kimi yanacaq məhsulları ilə təmin etməklə yanaşı, SOCAR-ın Azərbaycandakı neft-kimya müəssisələrini də xammal ilə təchiz edir. Zavodda istehsal edilən məhsulun bir qismi isə ixrac olunur. NEZ-in istehsal gücünün artırılması, ölkənin "Avro-5" standartına uyğun olan yüksək keyfiyyətli yanacaqla təmin edilməsi, “Azərikimya” İB-nin sabit xammal təchizatı və neft məhsullarının ixrac potensialının yüksəldilməsi məqsədi ilə həyata keçirilən modernizasiya və yenidənqurma işləri ölkə sənayesi üçün mühüm əhəmiyyət daşıyır.