“Cənub Qaz Dəhlizi” Məşvərət Şurası çərçivəsində nazirlərin IV toplantısının tarixi müəyyənləşib

Bakı. 11 yanvar. REPORT.AZ/ “Cənub Qaz Dəhlizi” Məşvərət Şurası çərçivəsində nazirlərin IV toplantısının keçirilmə vaxtı fevralın 15-nə təyin edilib.

Energetika Nazirliyindən “Report”a verilən məlumata görə, Məşvərət Şurası çərçivəsində nazirlərin növbəti toplantısının təşkili ilə əlaqədar Nazirlikdə bir sıra görüşlər keçirilib və müzakirələr aparılıb.

Məşvərət Şurasında iştirak etmək üçün müvafiq ölkələrə və bir sıra beynəlxalq maliyyə təşkilatlarına dəvət məktubları göndərilib. “Cənub Qaz Dəhlizi” Məşvərət Şurası çərçivəsində nazirlərin IV toplantısının proqram və gündəliyinin hazırlanması ilə bağlı tədbirlər davam etdirilir.

Xatırladaq ki, “Cənub Qaz Dəhlizi”nin Məşvərət Şurası çərçivəsində nazirlərin ilk toplantısı 2015-ci il fevralın 12-də, ikinci toplantı 2016-cı il fevralın 29-da, üçüncü toplantı isə ötən il fevralın 23-də keçirilib.