“Bibiheybət” Gəmi Təmiri Zavodunda 162 günəş paneli quraşdırılıb

“Azərbaycan Xəzər Dəniz Gəmiçiliyi” QSC-nin (ASCO) “Bibiheybət” Gəmi Təmiri Zavodunun (GTZ) istehsalat sexlərinin birinin damında 512 kvadratmetr ərazidə hər biri 690 Vt olmaqla,162 ədəd günəş paneli quraşdırılıb.

"Report" xəbər verir ki, bu barədə ASCO məlumat yayıb.

Bildirilir ki, sistem günəş panellərindən, invertor, kabelləşmə, SCADA idarəetmə qurğusundan və sayğacdan ibarətdir. Buradakı invertor qurğusuna 10 il, günəş panellərinə isə 25 il zəmanət verilib.

Hesablamalara görə, Abşeronda il ərzində 2200-2400 saat günəşli hava şəraiti olur. Buna uyğun olaraq “Bibiheybət” GTZ-də quraşdırılan sistem vasitəsilə il ərzində 380 Volt, 240-260 MVt elektrik enerjisinin istehsal edilməsi gözlənilir.