Azərbaycan Dövlət Neft Fondu ötən il "AÇG" və "Şahdəniz" layihələrindən 7,2 mlrd. dollar qazanıb

Bakı. 19 yanvar. REPORT.AZ/ Azərbaycan Dövlət Neft Fonduna (ARDNF) 2015-ci il ərzində "Azəri-Çıraq-Günəşli" (AÇG) yataqlar bloku üzrə mənfəət nefti və "Şahdəniz" qaz-kondensat yatağı üzrə mənfəət qazının satışından ümumilikdə 7,223 mlrd. ABŞ dolları daxil olub.

"Report"a Fonddan verilən məlumata görə, bu məbləğin 6,9 mlrd. dollar AÇG-dən mənfəət neftinin, 323 mln. dollar "Şahdəniz" yatağından qazın satışından əldə olunub.

Məlumata görə, 2001-ci ildən bu il yanvarın 1-dək AÇG-dən 117 mlrd. dollar, 2007-ci ildən isə "Şahdəniz" yatağından 2,4 mlrd. dollar vəsait əldə olunub.

Vəsaitlərin idarə edilməsindən 2001-ci ildən ötən il dekabrın 31-dək 3,6 mlrd. dollar gəlir əldə edilib.