“ACWA Power” rəsmisi: "Azərbaycan bizim üçün regionda əsas ölkədir"

Azərbaycan “ACWA Power” üçün regionda əsas ölkədir.

“Report” xəbər verir ki, bunu Səudiyyə Ərəbistanının “ACWA Power” şirkətinin regional direktoru Abid Malik bu gün işə başlamış Bakı Enerji Forumunun I günündə bildirib.

O vurğulayıb ki, şirkət hazırda Azərbaycan hökuməti ilə dənizdə gücü 100 MVt-dan çox olan elektrik stansiyasının inşası layihəsi üzərində işləyir: “Ölkədəki yüksək sabitliyi və onun coğrafi mövqeyini nəzərə alsaq, Azərbaycanın bizim üçün çox önəmli olduğunu söyləyə bilərik. Biz bir müddətdir ki, bu ölkədə işləyirik”.

Regional direktorun sözlərinə görə, “yaşıl hidrogen” sahəsində əməkdaşlıq çox vacibdir.

A.Malik Azərbaycan Dövlət Neft Şirkəti (SOCAR) ilə neft-kimya istehsalının dekarbonlaşdırılması üzrə layihələrin əhəmiyyətini qeyd edib.

Xatırladaq ki, bu ilin may ayında Energetika Nazirliyi ilə "ACWA Power" arasında 200 MVt gücündə Batareya Enerji Saxlanc Sistemi (BESS) layihəsi üzrə icra müqaviləsi və 200 MVt gücündə quruda külək layihəsi üzrə çərçivə müqaviləsi imzalanıb.