Bakı Ali Neft Məktəbi və Polşanın WSB Universiteti arasında müqavilə imzalanıb

Bakı. 7 fevral. REPORT.AZ/ Bakı Ali Neft Məktəbində (BANM) Polşanın WSB Universitetinin rəhbərliyi ilə görüş keçirilib. 

Bu barədə "Report"a BANM-dən məlumat verilib.

Görüşdə BANM-ın rektoru Elmar Qasımov, WSB Universitetinin Beynəlxalq əməkdaşlıq üzrə prorektoru Rafal Rebilas, Beynəlxalq əlaqələr üzrə direktoru Pavel Urgacz və BANM-ın əməkdaşları iştirak ediblər.

Görüşdə tərəflər arasında tələbə mübadiləsi, müəllim-professor heyətinin mübadiləsi, elmi materialların mübadiləsi, birgə tədqiqat və təhsil layihələri üzrə əməkdaşlıq etmək üzrə razılığa gəlinib. Nəticə olaraq tərəflər bu istiqamətlər üzrə əməkdaşlığı özündə əks etdirən ikitərəfli əməkdaşlıq haqqında razılaşma imzalayıblar.

Hər iki universitet həmçinin magistratura pilləsi üzrə əməkdaşlıq etmək qərarına gəlib. Belə ki, Ali Məktəbin WSB Universitetilə ikili diplom proqramı nəticəsində BANM-ın Biznesin idarə edilməsi (MBA) ixtisası üzrə təhsil alan magistr tələbələrinin hər iki universitetin diplomlarını əldə etmək şansı olacaq. Bu münasibətlə də tərəflər arasında əməkdaşlıq müqaviləsi imzalanıb. Müqavilə özündə həmçinin bu istiqamət üzrə təhsil planlarını və proqramlarını yaratmaq üçün aparıcı mütəxəssislərdən ibarət elmi və metodiki şuranın təşkil olunmasını, distant təhsil proqramının tətbiq olunmasını, müasir interaktiv texnologiyaların (elektron platformaların) layihə iştirakçıları tərəfindən istifadə olunması və digər istiqamətləri özündə ehtiva edir.

WSB Universitetinin nümayəndələri həmçinin Ali Məktəbin laboratoriyaları, idman kompleksi, kitabxanası, mühazirə otaqları və zallarını gəzərək kampus ilə yaxından tanış olub və tələbələr üçün yaradılmış şəraitdən heyrətləndiklərini bildiriblər.