ETSN rəsmisi: "Yaşıllıqların salınmasında bir sıra rayonlar və şəhərlər fərqlənir"

"Yeni yaşıllıqların salınması və ağac əkilməsinin təşviqi məqsədilə keçirilən aksiyalarda bir sıra rayon icra hakimiyyətləri öz fəallıqları ilə fərqlənir. Bu da ağacəkmə kampaniyasının daha da kütləviləşməsinə rəvac verir". 

"Report" xəbər verir ki, bu fikirləri jurnalistlərə açıqlamasında Ekologiya və Təbii Sərvətlər Nazirliyinin Mətbuat xidmətinin rəhbəri İradə İbrahimova bildirib.

"Aparılan təhlillərə əsasən deyə bilərik ki, paytaxtın Yasamal, Nərimanov, Binəqədi, Xəzər rayonlarında, bölgələr üzrə Şəmkir, Sumqayıt, Şirvan, Ağcabədi, Yevlax, Mingəçevir, Qax şəhərlərində yaşıllıqların salınması tədbirləri artıq kütləvi hal alıb və bu rayonlarda daha geniş yaşıllıq zolaqları salınıb. Əminik ki, belə tədbirlər digər rayonlar üçün də stimul olacaq, geniş yaşıllıq sahələri salınacaq və qorunacaq", - ETSN rəsmisi deyib.

Qeyd edək ki, ağacəkmə aksiyalarının keçirilməsində məqsəd ölkədə yaşıllıq sahələrinin artırılması, qorunması və insanlarda təbiətə qayğı hissinin aşılanmasıdır.